ಅಂತರಾಳ

ಲೋಕದ ದೃಷ್ಟಿಯಲಿ ನನ್ನ ಮನಸೊಂದು ವಿಶಾಲ ಸಾಗರ, 

ಅದರ ಅಂತರಾಳದಿ ಸಹಸ್ರ ಭಾವನೆಗಳ ಸಂಚಾರ, 

ಆದರೂ ಆ ಅಂತರಾಳದ ಬಗ್ಗೆ ನೀ ತಿಳಿದಿಲ್ಲ ಎಲ್ಲ ವಿಚಾರ, 

ಅದು ಪ್ಯಾಥೋಮೀಟರಿಗೂ ನಿಲುಕದ ವಿಸ್ಮಯಗಳ ಆಗರ!

ಮನದಾಳ ಹುಡುಕಲು ಸೋತ ನೀ ನನ್ನ ಭೂತಾಯಿಯಾಗಿಸಿದೆ, 

ನನ್ನಿಂದ ಹೊಸ ಸೃಷ್ಟಿಯ ಮಾತೃತ್ವಕ್ಕೆ ನಾಂದಿಹಾಡಿಸಿದೆ, 

ಆಗಲೂ ನನ್ನಂತರಾಳದ ಕೋಲಾಹಲ ತಿಳಿಯದೆ ಹೋದೆ, 

ಮತ್ತೆ-ಮತ್ತೆ ಸೋಲುತಿರುವೆ ಅರಿಯಲು-ಅಳೆಯಲು ಸಾಧನವಿಲ್ಲದೆ! 

ಕಡಲ ಅಂತರಾಳವಾದರೂ ನಿಲುಕಬಹುದೇನೋ ಶೋಧನೆಗೆ, 

ಭುವಿಯ ಅಂತರಾಳವಾದರೂ ಗ್ರಹಿಸಬಹುದೇನೋ ಊಹೆಗೆ, 

ಆದರೆ..... ನಿಜದಿ ನಾ ಹೆಣ್ಣು! 

ನನ್ನ ಅಂತರಾಳ ಎಟುಕಬಹುದೇ ನಿನ್ನ ಕಲ್ಪನೆಗೆ?? 

ಚಂಚಲದ ಅತಿರೇಕದ ಭಾವನೆಗಳ ಆಳ; ನನ್ನ ಅಂತರಾಳ.... 

ಹಿಡಿತಕ್ಕೆ ಸಿಗಬಹುದೇ ನಿನಗೆ??