ಅಮ್ಮ

ನವಮಾಸಗಳು ಉದರದಿ ಭರಿಸಿ

ನೋವುಗಳ ನಗುನಗುತ ನುಂಗಿ  

ನವಜೀವವ ಅವನಿಗಿಳಿಸುತ

ನವೋಲ್ಲಾಸದಿ ನಲಿವ  ಓ ಅಮ್ಮ 

ಅನುಕ್ಷಣವು ಕಂದನಾರೈಕೆಯಲಿ

ತನ್ನ ತಾನ್ ಮರೆಯುತಲಿ

ಅನ್ನಪಾನಾದಿಗಳ ಉಣಿಸುತ 

ಅನವರತ ಓಲೈಸುವ ಓ ಅಮ್ಮ

ಕಂದನ ಸುಖ ಸಂತೋಷಕೆ 

ಬಂದ ಬವಣೆಗಳ ನುಂಗುತ್ತಾ 

ಮಂದಹಾಸವನು ಸೂಸುತಾ

ಮುದವನುಣಿಸುವ ಓ ಅಮ್ಮ

ಅಕ್ಕರದಿ ಅಕ್ಕರಗಳ ಕಲಿಸುತ

ಸಕ್ಕರೆಯ ಮಾತುಗಳನಾಡುತ

ಕಕ್ಕುಲಾತಿಯಲಿ ಕರುಳಕುಡಿಯ

ಚೊಕ್ಕದಲಿ ಮುದ್ದಿಸುವ ಓ ಅಮ್ಮ

ಮಗುವಿನ ಜಗವೇ ನೀನು 

ಜಗದ ಅದ್ಭುತವೇ ನೀನು

ಸಗ್ಗಸುಖದಾ ಖಣಿ ನೀನು

ಲೋಗರ ಮೂಲ ನೀ ಓ ಅಮ್ಮ 

ನೀನಿಲ್ಲದೆ ಮಗುವಿಗೆ ಉಸಿರಿಲ್ಲ

ನೀನಿಲ್ಲದ ಮನೆ ಮನೆಯಲ್ಲ

ನೀನಿಲ್ಲದೆ ಮಗುವಿಗೆ ಬದುಕಿಲ್ಲ

ನೀನಿಲ್ಲದೆ ಜಗವಿಲ್ಲ ಓ ಅಮ್ಮ