लाइब्रेरी
प्रोफाइल
पंचायती चुनावाँ दी बहार
पंचायती चुनावाँ दी बहार
आई गई पंज सालां बाद,
पंचायती चुनावाँ दी बहार लोको,
शुरू होई गेया पंचां ,सरपंचा दा ,
गरांयें च प्रचार लोको।
पंचायता दिया खुशहालिया दा ,
रखणेयो तुसां ख्याल लोको ।
पढ़ेयो लिखेयो, ईमानदार बन्दे जो,
चुणनेयो तुसां ,"प्रधान "लोको ।।
जल्ले लेई करी मछियां फसाणे जो,
मछुवारे होई गए तैयार लोको।
बकरेयाँ जो हलाल करने ताईं केइयाँ,
डाटिया जो लाई ली धार लोको ।।
केइयाँ शराबां बण्डनियाँ,
कन्ने बण्डने नोट हजार लोको ।
नोटां कन्ने शराबे ताईं दिखनेयो,
मत करदे अपणा वोट खराब लोको।।
मिठियाँ मिठियाँ गल्लां करी के,
इन्ना तुसां जो ठगणा ऐ ।
कुसीजो पेन्सण,कुसीजो नलका,
कुसीजो मकान बण्डणा ऐ ।।
चूठेयाँ लारेयाँ लाई करी,
पंज साल होई जांदे फरार लोको।।
वोट तुसां उसी जो पाणा,
जिसिजो पंचायती दा ख्याल होवे ।
जेहड़ा विकास दा कम्म करवाये,
जिस च सेवा दा भाव होवे।
लोकां दे जेहड़ा दुख दर्द समझे,
जिस च कम्म करवाने दी चाह होवे,
सरकारां दियां सकीमां समझे,
जिसिजो आउँदा हिसाब किताब होवे ।
जनमानस दे कम्म सै औवे,
होए समझदार कन्ने नेक इंसान लोको ।
जाति धर्म जो भुल्ली करी ,
ऐसा बन्दा चुणना प्रधान लोको ।
बाकियाँ जो तुसां उछलणा देया ,
समझणा देया फन्नेखान लोको ।
सोझिया ने तुसां वोट पानेयों,
रखनेयों वोटे दा सम्मान लोको ।।
