लग्गादा चुनाव नेड़े आई गए(पहाड़ी व्यंग्य कविता)
लग्गादा चुनाव नेड़े आई गए(पहाड़ी व्यंग्य कविता)
पिंडाँ विच न रौनकाँ लग्गियां,
हस्सी हस्सी ने फलाणा पाणा लग्गी पये
लगदा पंचायती दे चुनाव नेड़े आई गये
जेहड़े कदी किसे ने ,नी गल्ल थे करदे
सै भी हथ्थ जोड़ी सणकाँ लाणा लग्गी पये
लग्गा दा पंचायती दे चुनाव नेड़े आई गये
अक्कडी अक्कड़ी चलदे थे जेड़े
सै अपनी चाल भी पुलाणा लगी पये
जीनां पेंटां पाणेयां आले
कुर्ते पजामें पाणा लग्गी पये
लग्गा दा पंचायती दे चुनाव नेड़े आई गये
खिज्जी खिज्जी ने थे ,जेडे इक दुग्गे जो कुआँदे
गल्लां गल्लां पर थे जेडे गाल मुआल करदे
हुण सै भी अम्मा जी, बापू जी , गलाणा लग्गी पये
सिददे मुंहे जिन्हां कदी "नमस्ते "भी नी कीती,
सै भी बुड्ढेयाँ दे गोड्डे दबाणा लग्गी पये
लग्गा दा पंचायती दे चुनाव नेड़े आई गये
इक दुग्गे दे घरे कदी पैर नी पाया
घरे घरे मण्डलियां लाणा लग्गी पये
कदी कुसे दा ना दुःख बण्डाया,
मुड़ी मुड़ी जफ्फियां पाणा लग्गी पये
लग्गा दा पंचायती दे चुनाव नेड़े आई गये
भल मनसाईया दे वास्ते कदी पंज रुपईये नई दित्ते,
जिन्ना चलदेयाँ कम्मा च रोड़े पाये
दिख्खा भलेयो सै बन्दे भी
विकासे दे कम्म गिनाणा लग्गी पये
लग्गा दा पंचायती दे चुनाव नेड़े आई गये
इन्ना चुनावाँ जो समझा दे कमाईया दा ज़रिया
सारे पंच परधान खड़ोंणा लग्गी पये
इक दुग्गे दियाँ चुंगा च आई करी
अपणा अपणा माहौल बनाणा लग्गी पये
लग्गा दा पंचायती दे चुनाव नेड़े आई गये
पीणे आलेयां दियाँ मौजां लग्गी पेइयाँ
टल्ली होई करी घरे औणा लग्गी पये
देसी दारू पीणे आले
विसकियाँ दियाँ वरैटियाँ गिनाणा लग्गी पये
लग्गा दा पंचायती दे चुनाव नेड़े आई गये ।
लग्गा दा पंचायती दे चुनाव नेड़े आई गये ।।