बड़ा डर लागे कोरोना से

रंगवा लगाइब न अबिरवा लगाइब

बड़ा डर लागे केरोनवा से

अबकी फगुनवा खेलब ना होली ये भौजी

बड़ा डर लागे केरोनवा से

गलवा ना छूअब ना अँचरा के रंगब

ना हथवा मिलाईब फगुनवा से

साली से खेलब ना सरहज से खेलब

केकरा से खेलब हम होलिया ये भौजी

बड़ा डर लागे केरोनवा से

झारखंड मे खेलब ना बिहार मे खेलब

दिल्ली मे खिल्ली उढ़ावे केरोनवा ये भौजी

कान्हा रंग बरसावे बरसनवा मे

सर्दी से बची की खांसी से बची

बीमारी से बची की महामारी से बची ये भौजी

केकेरो ना देहिया सटाइब जजनवा से

घरवा ना खेलब बहरिया ना खेलब

खेलब ना होलिया बहरिया ये भौजी

रंगवा लगाइब खरीहनवा मे

पुआ ना खाइब पकवनवा ना खाइब

घोरी भंगिया मुहवा ना चढ़ाइब ये भौजी

बड़ा डर लागे कोरोना से

ना हथवा मिलाईब फगुनवा।