કરામતી ચિત્રકાર

રસ્તા પર એક નાની છોકરી ચિત્રોનું વેચાણ કરતી હતી. તેના ચિત્રો જોઈ એક ચિત્રકાર ત્યાં ઊભા રહી બધા ચિત્રોનું નિરીક્ષણ કરતા મનમાં વિચારવા લાગ્યો કે, " ગજબની કરામત કરી છે આ ચિત્રોમાં ! આ કરામાતી ચિત્રકારને મળવું પડશે. આતો રસ્તા પર વેચવાના નહીં પણ મોટા મોટા ચિત્રકારોની હરોળમાં આવે તેવા ચિત્રો છે."

છોકરીને પૂછ્યું કે, " આ પેઇન્ટિંગનો શું ભાવ છે ?"

છોકરીએ હસતા જવાબ આપ્યો, " જે ગમે તે 500 રૂપિયા."

 પેલો ભાઈ વિચારમાં પડી ગયો કે આ ચિત્રોની કિંમત તો લાખોમાં આવે એમ છે પણ માત્ર 500 માં ?

ફરી છોકરીને પૂછ્યું, " આ ચિત્રો તે બનાવ્યા છે ? તું ભણે છે ?"

 "ના..! મેં નહીં મારા પપ્પા એ બનાવ્યા છે અને હું અહીં વેચું છું, ભણતી નથી." હસતા જ જવાબ આપ્યો.

 " ક્યાં છે તારા પપ્પા મને મળાવીશ ?"

 "હા..! સામે જ તો મારુ ઘર છે ચાલો."

ઘરે જતા જે જોયું પેલો ભાઈ દુઃખ સાથે નવાઈ પામ્યો.

છોકરીએ જઈ તેના પપ્પાના મોમાં રહેલી કલરની પીંછી કાઢી કહ્યું, "પપ્પા તમને કોઈ મળવા આવ્યું છે."