યુગો યુગોથી
યુગો યુગોથી
યુગો યુગોથી જ્યાંના ત્યાં જ છીએ,
ફરી ફરી ઊગવા માટે જ આથમીએ,
કબૂલ, ચાલવામાં રાખી નથી ચાડ,
સામટી તે ય રાખી દીધી છે વાડ,
એક હોય તો ય એને ઓળંગીએ,
યુગો યુગોથી જ્યાંના ત્યાં જ છીએ.
સફર શરું થઇ ને ચકરાવવામાં,
કાચા પડ્યા સંબંધ નિભાવવામાં,
ડૂબ્યા ડૂબ્યા ભવસાગર કેમ તરીએ
યુગો યુગોથી જ્યાંના ત્યાં જ છીએ.
લાગે છે મળવાની નથી ઉતાવળ,
રાહમાં ઉગાડે એથી જ તું બાવળ,
આવી ન શકીએ, આવવા ચહીએ,
યુગો યુગોથી જ્યાંના ત્યાં જ છીએ.
તું શોધે અમારામાં બસ એક તરસ,
એમ નીકળી ગયા વરસોના વરસ,
તે મોકલ્યા કે દીપ થઇ ઝળહળીએ
યુગો યુગોથી જ્યાંના ત્યાં જ છીએ.
ભળતા ભળતા જ રસ્તા સૌ લીધા,
જમુનાના બદલે ઝાંઝવા જ પીધા,
શું કરીએ સૂકાભઠ્ઠ રણમાં રહીએ,
યુગો યુગોથી જ્યાંના ત્યાં જ છીએ.
શ્વાસ અને શબ્દનું ના લીધુ શરણ,
એક પછી એક આવતા એમ આવરણ,
શું હતા ને કોણ હતા કેમ કહીએ,
યુગો યુગોથી જ્યાંના ત્યાં જ છીએ.
હાથમાં લખી લિખાવટ ન સ્યાહીની
અમ કરમોએ લખી કથા તબાહીની,
ભૂસાય ના એ ભૂસવા લાખ મથીએ,
યુગો યુગોથી જ્યાંના ત્યાં જ છીએ.