તો શું ?

અંધકારની દિશામાં પડછાયો સંતાયો

તો શું, આશાના પ્રકાશ નહિ રેલવાના ?

તો રાહી, આગળ ડગ નહિ ભરવાના ?

યાદોએ રાતમાં કર્યો ઉજાગરો,

તો શું, સંધ્યાના ઓટલે નહિ સૂવાના ?

તો રાહી આગળ ડગ નહિ ભરવાના ?

સમયની રેતી હાથેથી સરકે,

તો શું, ઉરના ઈશને નહિ ઢંઢોળવાના ?

તો રાહી આગળ ડગ નહિ ભરવાના ?

ઘરનાં સબંધો ઉંબરે સુકાયા,

તો શું, બારણા ઉજાસે નહી ખોલવાના ?

તો રાહી આગળ ડગ નહિ ભરવાના ?

ચિતાના લાકડે સૂવાના સૌ લોક

તો શું, જીવન પથ પર નહીં ચાલવાના ?

તો રાહી આગળ ડગ નહિ ભરવાના ?