થનગનતું યૌવન
થનગનતું યૌવન
સંજોગો સામે લડી લે,
આંસુ પી ને સ્મિતને જડી લે !
એને દુનિયાનો ન હોય કોઈ ડર,
સંઘર્ષ સાગરે તરતાં શીખી,
લે એવો એનો કર !
આ તો છે થનગનતું યૌવન !
નસીબનો ગ્રહ નડી શકતો નથી એને ક્યારેય,
પુરુષાર્થથી ભાગ્યના ચક્રોયે ફેરવી લે ત્યારેય !
સમય એને ન રોકી શકે એવી એની ગતિ,
સ્વેચ્છાએ કરી લે પરિવર્તન એવી એની મતિ !
આ તો છે થનગનતું યૌવન !
સમીપ હોય નિત્ય મહાપુરુષોના આદર્શની વાણી,
લે ગૌરવ 'સ્વ'નું દેશની સંસ્કૃતિની કહાણી જાણી !
અન્યાય જોતાં જ એના લોચન લાલ થઈ જાય,
લાચારી-લઘુતાથી એનો મેળ કદી ન થાય!
આ તો છે થનગનતું યૌવન !
મનન, ચિંતન કરીને જીવનદિશાનું કરે સંશોધન,
વિસર્જન થાય જ્યાંથી કરી લે,
નવું સર્જન એવું મનોમંથન !
ક્યારેય એને ન હોય ફૂરસદ એના કાર્ય-કામથી,
છતાંયે થોડી પળે કરી લે એ પ્રીત રાધે-શ્યામથી !
આ તો છે થનગનતું યૌવન !
કોઈ કહે આમ ને કોઈ કહે તેમ,
'ઈશ્ક' કરી લે સાચા દિલથી રહે એ તો હેમખેમ !
સર્વ સપનાઓને સમેટી એ તો સર કરી લે,
'સ્વપ્નીલ' થઈ અત્યંત પ્રેમે બાહુપાશમાં ભરી લે!
આ તો છે થનગનતું યૌવન !
આ તો છે આદિથી અંત સુધીનું,
'યુવાવૃત્તિ'નું થનગનતું યૌવન !