સૃષ્ટિની સૌથી સુંદર વસ્તુ !

ચાલને, સૃષ્ટિની સૌથી સુંદર વસ્તુ બનાવશું,

એક અનોખો અનુભવ કરશું,

ઈશ્વરના વિશાળ જગઘરમાં

નાનું 'સ્વપ્ન' સજાવશું ?

પ્રવેશવાનો એવો ઉંબરો,

જ્યાં હોઠ પર લાલી લાગે મધુર સ્મિતની,

પ્રેમના રંગથી રંગાયેલા કક્ષમાં,

શાંતિનું તિલક લાગે લલાટે !

રુપ તો તારું એવું દીપી ઊઠે,

જેમ ઘરના મંદિરની દિપક જ્યોત,

અને એ મંદિરની 'કૃષ્ણ મૂર્તિ',

આતુર બને નિહાળવા તારું 'તેજરુપ' !

ચારેકોર ઊભી હોય જ્યાં અતૂટ વિશ્વાસની દિવાલ,

જ્યાં શોભિત હોય સહાનુભૂતિના ફર્નિચરથી ડ્રોઈંગરુમ,

જ્યારે લાગે તને ભુખ ત્યારે નિર્મલ રસોઈઘરમાં,

મળે તને 'જીવન માધુર્ય'નો મહાપ્રસાદ ! 

નીરવ એકાંત માટે વિશ્રામની લાગે તને તલપ,

સ્નેહની પથરાઈ તારી સુખશૈયા એવી બેડરુમ,

નયનની સમક્ષ નિહાળે તુજ મીઠી યાદોની તસવીર,

એ યાદોના સ્વપ્નમાં બને આપણું એક નવીન સ્વપ્ન !

હા, એક કક્ષ જીવનના પુસ્તકોનું પણ,

જ્યાં ખીલી ઊઠે મન ને ઉછળે ઉત્સાહનો ઉમંગ,

ત્યાં એક ભાવના પાના પર,

રુપેરી કલમથી લખાયેલ 'કાવ્ય કિરણ' થકી, 

હસ્તરેખામાં રંગાઈ જાય પ્રારબ્ધ !

"તું' ને 'હું' આપણે સંગાથે,

 કરીશું આ સ્વપ્નની સચ્ચાઈ,

હદયમાં આ ઘર વસાવી બનીશૂં 'સ્વપ્નીલ' !

આપણે પણ ધરતી પર નાનું 'સ્વર્ગ' બનાવશું,

ચાલને, સૃષ્ટિની સૌથી સુંદર વસ્તુ બનાવશું.