સરદારનું ગીત-ર૮.
સરદારનું ગીત-ર૮.
હૈડિયા વેરો-ર (ઈ.સ. ૧૯ર૩)
બોરસદે સભા રાખી, લોકો ભેગા કરાય રે;
એમાં વલ્લભભાઈનું, આવું ભાષણ થાય રે.
લડતનો કરી લેવો, ગંભીર થૈ’ વિચાર રે;
લડતને કરી ચાલુ, ઝૂકવું ન લગાર રે.
બેત્રણ રૂપિયાની તો, નથી કોઈ વિસાત રે;
લૂંટારાના કહે સાથી, એ સહાય ન વાત રે.
અન્યાયી દંડ આવો આ, કદીયે ન ભરાય રે;
જુલ્મો સામે થશું ત્યારે, આપણી જીત થાય રે.
મક્કમ લડવા છીએ, લોકો આપે જવાબ રે;
સરકારી તુમાખીનો, આપવો છે હિસાબ રે.
સુણી નિર્ણય લોકોનો, ગુસ્સે થૈ સરકાર રે;
જપ્તીના હુકમો તેણે, પાડી દીધા બહાર રે.
ભેંસો લૂંટાય કોઈની, કોઈનો લોટ શેર રે;
કોઈનાં તેલ-ઘી લૂંટી, કરે લીલાલહેર રે.
નારીનાં કડલાં લૂંટી, કરે દંડ વસૂલ રે;
દંડ દેવા છતાં લોકો, થયા નહિ કબૂલ રે.
જપ્તી માટે મુખી પોતે, જરા દેતા ન સાથ રે;
બની ગયેલ સાહેબો, વિના સાથ અનાથ રે.
નિષ્ફળ બનતાં જપ્તી, નવો દાવ રમાય રે;
જમીન ખાલસા માટે, નોટિસો બજવાય રે.
ડરથી ન થયા લોકો, વિચલિત જરાય રે;
બરબાદ થયા તોયે, હસતે મુખ ગાય રે.
હોમ મેમ્બર આવીને, આદરે છે તપાસ રે;
ને રજૂઆત લોકોની, લેવા લાગેલ ખાસ રે.
પોલીસની ગઈ ખુલ્લી, ખૂબ ઢાંકેલ પોલ રે;
આજ સુધી વગાડેલ, જૂઠના ખૂબ ઢોલ રે.
સરકારે કરી લીધો, ભૂલનો એકરાર રે;
દંડ ખેંચી લઈ પાછો, બની સમજદાર રે.
**
આપીને આકરો ભોગ, પ્રજાએ જીત મેળવી;
ભૂલી હવે બધા દોષ, જીતને છે પચાવવી.
(ક્રમશ:)