સંબંધોમાં હિસાબ ન હોય

સંબંધોના ક્યારેય હિસાબ ન હોય,

એમાં તો બસ નિખાલસતા હોય,

સંબંધો સાચવવાની બીક ન હોય,

એમાં બસ મનની મોકળાશ હોય,

સંબંધોમાં ગણતરી કરવાની ન હોય,

એમાં બસ લાગણીનો સરવાળો હોય,

સંબંધો કંઈ ઝડપથી તૂટતાં ન હોય,

એમાં બસ જરી બાંધછોડ કરવાની હોય,

સંબંધોનો પાયો ક્યારેય નબળો ન હોય,

એમાં બસ વિશ્વાસનું ઊંજણ પૂરવાનું હોય,

સંબંધોમાં સુખદુઃખ છૂપાવવાનાં ન હોય,

એમાં બસ હેતની હેલી જ વરસતી હોય.