પ્રીતનો તલસાટ
પ્રીતનો તલસાટ
મોકલ્યો ઈશે મોંઘેરો પરસાદ, આવ્યો ઝરમર ઝરમર વરસાદ !
તારા સ્મરણોમાં ભીંજાયને,
થયો પ્રીતનો તલસાટ !
મયુર ટહુક્યા ટેહુક ટેહુક,
ઢેલડી નાચી ઊઠી થૈ થૈકાર;
મન મ્હારું લાગી ગયું તુજમાં, ચંચળ રહે મુજ આતમનો ઝણકાર !
માટી મહેકી ઊઠી અણુએ અણુથી,
ધરતીએ ધારણ કર્યો લીલુડો લીબાસ;
મારા જીવનનો શણગાર તુજથી , તેથી જ તો વટવાળો છે તારો મીજાસ !
ધરાની છાતીએ ઉગ્યા હર્યાભર્યા તૃણ,
જાણે નવજાત શિશુના શિરે ઉગ્યા કેશ;
મુજ ઓષ્ટ પર ખીલી લાલી, ને નયનોમાં અંજાય ગઈ કાજળ લેશ !
વીજળી જાણે ચમકીને ખેંચે છે તસવીરો,
જગદીશ જેવો કોણ તસવીરકાર ?
તારી મીઠી યાદોની છે મારા નયનોમાં તસવીરો, મારા જીવનનો છે તું ચિત્રકાર !
શરમથી તન્મય થયું તનમન વરસાદમાં,
શમણાંમાં પિયુ તું આવ્યો;
‘સ્વપ્નીલ‘ના અધૂરા સ્વપ્નમાં, સોહામણી પ્રીત વર્ષા તું લાવ્યો ! શીતલ આનંદ રાયસોની