ફરી પાછું

મને તું આપી દે એ યાદોનું નજરાણું ફરી પાછું,

ધડકતા હૈયાને તું પૂછી લે સરનામું ફરી પાછું,

એ મેઘલી રાતને કહી દે જરા વરસે ધીમી ધારે

તારી સંગાથે આ વરસાદે ભીંજાવું ફરી પાછું, 

ક્યાં માંગુ હું ચાંદને તારા ભરેલાં એ નજારા

તારી એક ઝલકને નિરખવાને માંગુ ફરી પાછું,

મારા ઉપવનનાં ફૂલોની મોસમ ચહેરો આ તમારો

એને મળી જાય આ ચહેરાને જોવાનું ફરી પાછું,

ખીલી ઊઠે વસંતના ફૂલો જો થાય દીદાર તમારા

 મળી જાય એને તમને જોવાનું બહાનું ફરી પાછું,

પ્રેમ સાગરમાં ઝોલા ખાતી જિંદગી ક્યાં ખોવાણી

જો મઝધારે એ ડૂબે તો હવે ક્યાં વહેવું ફરી પાછું,

બંધ આંખોમાં સપનાઓને સમાવી લેવા મથું છું,

જો એ સપનાઓમાં ફરી તું મળે એ ચાહું ફરી પાછું.