ફળિયા

સિમેન્ટના જંગલમાં સોના કરતા મોંઘા ફળીયા,

ગામડાની કેવી અનેરી શાન હતા અનોખા ફળીયા !

હજી જીવે છે મારૂં બચપણ એ અણમોલ ધૂળમાં,

કેટ કેટલી સ્મૃતિઓ સંઘરીને બેઠાં ફળીયા !

ખુલ્લા ખુલ્લા ને ખમીરવંતી ખાનદાનીના એ સાક્ષી,

બંધ ડેલીમાં દિલ ખોલીને કેવા હસતા ફળીયા !

હાકલા, પડાકા, ફડાકા ને કહૂંબાની ઈ સભાઓ,

શૂરવીરોને કેવું શૂરાતન ચડાવતા ફળીયા !

ને હવે ભાંગ્યા ગામડા ને વિસરાઈ એ સંસ્કૃતિ,

વિકાસ ને પ્રગતિના ખપ્પરમાં હોમાયા ફળીયા !

ઉદાસ સંધ્યાએ ઉતર્યા છે અસ્તચળના ઓળા,

ને પછી મેં જોયા આખી રાત પોકે પોકે રોતા ફળીયા !

એક "પરમ" વિરાસત વિસરાઈ ગઈ જીવનની,

હવે શહેરમાં સૌ "પાગલ" થઈને શોધતા ફળીયા !