ઓળખ

ઊંચી ઊંચી અગાસીઓને આંબતા પહેલા,

હર ઈમારતની બુનિયાદને ઓળખ !

બની બિંદુ સમાઈ જા સિંધુમાં એ પહેલા,

પવિત્ર ગંગાની ગુહ્ય ગંગોત્રીને ઓળખ !

સૃષ્ટિ તણી સુંદરતાને પામતા પહેલા,

તારી જ અંદરની કુરુપતાને ઓળખ !

કરુણા કેરા સાગરમાં ડૂબ એ પહેલા,

ક્રોધની ભભૂકતી જ્વાળાઓને ઓળખ !

જિંદગી તો બહુ ગઈ ને હવે થોડી જ રહી,

તો વધેલા વખતનાં વહેણને ઓળખ !

અચાનક કરશે રાવણ, સીતાહરણ,

છે ચો-પાસ તે લક્ષ્મણ - રેખાને ઓળખ !

પોકારતા પહેલા પરમાત્માને ઓ પામર,

તું પ્રાર્થનાના પરમ પગરવને ઓળખ !

આદિ - અનાદિ આધ્યાત્મ પામ એ પહેલાં,

અહિ ધર્મોમાં છૂપાયેલા અધર્મને ઓળખ !

અને જાણવો જ હોય આત્માને તારી અંદર,

તો પહેલા તારી જીવતી લાશને ઓળખ !

ને “પરમ” બની પામવું હોય પૂર્ણ ને સંપૂર્ણ,

તો “પાગલ” બની સ્વના શૂન્યને ઓળખ !