મને ગમે દરિયો

એક મને તું ગમે અને બીજો ગમતો દરિયો,

દૂરથી આવતી જોઈને તને કૂદતો દરિયો,

દરિયા કિનારે રેતમાં હું કોતરતો તારું નામ,

સ્પર્શવા તારાં નામને કેવો ઉછળતો દરિયો !

બની નાનું બાળક કરું સવારી હું સાઈકલની,

જોઈને મારો આ નવો કિરદાર હસતો દરિયો,

ઉછળતાં મોજાંની મોજમાં મિત્રોની ટોળી ઝૂમે,

યૌવનની આવારગી જોઈ ગરજતો દરિયો,

પૂનમે પણ મહેરામણ ગાંડો થઈ કરે ઘુઘવાટ,

અમાસની કાજળ રાત્રિને પણ ખમતો દરિયો.