મારી લાડકી ' મા '
મારી લાડકી ' મા '
લાવને આ કરચલીઓના સળને,
પ્રેમની ઉષ્માથી સપાટ કરી દઉં,
આંખોના કાજળથી ઘસી ઘસીને,
શ્વેત વર્ણ તારા કેશને કાળા કરી દઉં,
થર - થર ધ્રુજતા આ હાથ - પગમાં,
જોશ પૂરવા યૌવન મારું કુરબાન કરી દઉં,
તું શીદને પહેરે ઘસાયેલા પાલવની સાડી?
નવી નકોર ચુંદડીથી તને હું સજાવી દઉં.
યાદ છે તારા સીવેલા ઝભલા,
રોટલા ઘડતા એ હાથ દાઝેલા,
યાદ આવે છે મારી માવજતમાં,
તે કેટકેટલા ભોગ દીધેલા,
અને ચૂપચાપ તારા શોખને
કોઈ ઊંડી પેટીમાં પૂરેલા.
ના, નથી જોવો મારે આ
મજબૂરીનો ઘરડો વાઘો,
તારું જ ઘડેલું ચિત્ર હું,
હવે હું જ કરીશ તારો રંગ પાકો,
ઓ મા ! તેને બનાવી દઉં સખી,
અને હું તારો સખો,
સાચા અર્થમાં જોડે માણીએ,
જીવનનો બાકી હિસ્સો.
તારે પાનખર અને મારે વસંત,
નથી મંજૂર મને એ સમજનો શિરસ્તો.