લાગણી

શબ્દકોશમાં ન શોધો મારી લાગણીઓનો પર્યાય.

નહીં મળે ત્યાં બીજો એના જેવો જ જે સમજાય.

અલંકારે છે અનન્વયને બુધ્ધિથી ના એને માપો,

ક્યાંક વહેતી, ઘવાતી, અટકતી ના એને સંતાપો. 

છે એ ઊપજ ધબકતા ઉરની જ્યાંત્યાં ન વહેતી, 

હોય સન્મુખ ઝંકૃત હૈયું તો વ્યથા નિજની કહેતી.

કુદરતની આશિષ કહો કે શાપ જે માનો તે તમે, 

ખૂબ લાગે છે ઝટકા તોય મને તો બસ એ ગમે.

નથી મૂલવાતી અર્થના માપે અસ્તિત્વ છે અનોખું, 

રોકી ના રોકાય કદીએ એને વળી કેમ કરી હું ટોકું.