ખુમારી
ખુમારી
તાત થઈને નાથ આગળ માંગનારા કેટલા ?
મોતને આગળ કરીને હારનારા કેટલા ?
માંગવા કરતાં વધારે મોત વ્હાલું છે મને,
આગવી આવી ખુમારી રાખનારા કેટલા ?
ભાગ્યનું ભાણું અને હો કર્મ કેરો રોટલો,
ખુદ પસીનો ચોપડીને ચાખનારા કેટલા ?
જો અયાચક એ સુદામો આંગણે આવે કદી,
કૃષ્ણ થઈને આંગળીને ઝાલનારા કેટલા ?
ને સખાને ભેટવા ત્યાં કૃષ્ણ આવે દ્વાર પર,
તો સુદામો થઈ પ્રભુને પામનારા કેટલા ?
હસ્તરેખાઓ તમારી હાથતાળી આપશે,
ભાગ્યને આધીન રહીને બેસનારા કેટલા ?
આપશે ટુકડો એને ત્યાં છે હરિ પણ ઢૂકડો,
છે અનોખી આ પ્રથા પણ, માનનારા કેટલા ?
છો તમે શિલ્પી પછી રાખો હથોડી હાથમાં,
ખુદ ઘસીને જાતને ચમકાવનારા કેટલા ?
આંખ ઈશ્વરની વહાવે કર્મની 'હેલી' સદા,
પણ અહમ છત્રી ત્યજીને ઝીલનારા કેટલા ?