જ્યારે આક્રોશ પ્રજ્વલિત થશે

આપણે તો આમ જ રોજ બ રોજ હરખાવાનું ને કરમાવાનું ?

આપણે માટે તો દિન બ દિન તસુ તસુ કરી ડૂબવાનું ?

ઢાંકણીયે શોધેલી ન જડે તેમ પળ પળ જીવવાનું ?

અતિથિઓની આવનજાવનના કલશોર મહીં હરખાવાનું ?

અછતઅભાવ, મોંઘવારી ભૂલી નગારખાને ઝૂમવાનું !

રાજાવાજાં ને... સરખાંને મેળે મહાલવાનું ?

ભૂખ્યાંતરસ્યાં લાઈનમાં ઊભાં એમ ભૂલવાનું ?

નદીકિનારે ટામેટુંનાં સપનાંનો તમાશો જોવાનું ?

એમના ખાણીપીણી ને જલસાના તીરે મહાસુખ માણવાનું ?

પાંચવર્ષે મુખદર્શને રાજી રહેવાનું ને માંગવાનું ?

જળ, જંગલ ને જમીન અમારી છે કહેતાં રહેવાનું ?

પળેપળે બેબસ જીવવાનું ને દિન બ દિન ડૂબવાનું ?

આમને આમ જ આપણે તો હરખાવાનું ને કરમાવાનું ?

ના રે ના, જ્યારે આક્રોશ પ્રજ્વલિત થશે ત્યારે ?