ઉનાળાની બપોર જેવી જિંદગી
ઉનાળાની બપોર જેવી જિંદગી
પાછું ફરીને જોતાં તરવરે છે,
આશાનિરાશા,હરખશોક,સુખદ:ખનું ઋતુચક્ર.
ચૈતર-વૈશાખના વાયરા ને જેઠિયો તાપ !
છૈયાંછોકરાંની પરીક્ષાઓ ને વે'વાલગનની મોસમ.
સિઝનનાં કામની યાદીમાં વણાયેલી,
ગૂંથાયેલી ને ઘૂંટાયેલી એ ઉનાળુ બપોર !
અનાજપાણી,મરીમસાલા,સેવપાપડ,વડીવેફર,
મેથિયાં-અથાણાં, રાયતી ને છૂંદા- મુરબ્બાની ભરમાર !
શાકની સુકવણી ને બફાણાં સમેત કેરીનાં કામ !
ભરચક દિવસો ને બેનભાણેજડાંથી ઊભરાતું ઘર !
ત્યારે તો લાગતું હતું બળબળતી ઉનાળુ બપોર જેવું !
મધ્યાહ્નના આકરા સૂરજ જેવો બાઈનો મિજાજ!
ઘાસથી ઊભરાયેલાં ને ખાલી થતાં ગોદામો
વચ્ચે રહેંસાઈ ગયેલી જિંદગીમાં,
કોયલના ટહુકે જીવવાની હતી આશ !
હવે તો વીતી ગઈ છે એ પ્રખર તાપની વેળા !
ઉનાળુ બપોર વીતે છે વાતાનુકૂલિત શયનખંડે !
એશોઆરામથી સભર નિરાંતવી જિંદગી !
તો પણ કેમ યાદ આવ્યા કરે છે ?
એ સિઝનનાં કામ ?
બેનભાણેજડાં,મામામોસાળ ?
ને પ્રખર તાપે સહરાની તરસે વીતેલી એ જિંદગી ?
ને કોયલનો ટહુકો !