કયાં ખોજ કરું પ્રેમની ?
કયાં ખોજ કરું પ્રેમની ?
મુગ્ધ અવસ્થામાં પ્રથમ તારામૈત્રકની ઝલકમાં કે
સ્વજનોની આંખમાં ધૂળ ઝોંકી કરેલી મુલાકાતોમાં ?
કયાં હશે પ્રેમ ?
ધર્મ, અર્થ, કામ ને મોક્ષની વેદીમાં ?
કે સપ્તપદીનાં ઉભયપક્ષી વચનોમાં ?
કે આપણી એકત્વની આરાધના થકી સર્જિત અદ્વૈતના આનંદમાં ?
કે પછી વાડીવજીફા, ગાડીબંગલા, માલમિલકતની ભાંજગડમાં ?
કે બેન્ક, એલઆઈસી વગેરે વગેરે કે ઘરખાતે મારુ નામ ક્યાંની મૂંઝવણમાં ?
કે દીવાનખંડની બેઠકોમાં ડહાપણ દર્શાવીને શયનખંડમાં મન મૂકીને લડવાના મિજાજમાં ?
કે રસોડાના કરતબ દ્વારા તારા પેટથી મન સુધી જવાના મનસૂબામાં ?
કે તે સામ્રાજ્યના પ્રલંબ કારભારમાં વાસણકૂસણના ખડખડાટમાં ?
કે સિઝનનાં મરીમસાલાનાં કામમાં કે દિવાળીની સફાઈમાં ?
કે સામાજિક કારવ્યવહારમાં ?
કે સંતાનોને કરાવવાનાં હોમવર્કમાં ?
કે એમની પેરન્ટ્સ મીટીંગની બબાલમાં?કે 'મારી માને સાચવ તો હું તારો જ છું ',ની ક્વિઝને ઉકેલવાની મથામણમાં ?
કે વંશાવળીની વડવાઈના જતનમાં ?
કે લગ્નની વીસ-પચીસ વર્ષની જયંતીની ઉજવણીનાં સપનામાં ?
કે ગમતાંની સાથે મળીને કરીશુંની મહેફિલની રાહમાં ?
કે આનંદની સરવાણીમાં રમતાંભમતાં ઝરણાને જોવાની ચાહતમાં ?
કે હવે પિસ્તાલીસ-છેતાલીસ વર્ષે દાક્તરોની મુલાકાતોમાં સાથે રહેવાના કંટાળામાં ? કે સાથી હાથ બઢાનાની જૂની ઘસાયેલી રેક્ડની મરામતમાં ?
અરે !
યાદ આવ્યું !
તેં તો તો કહેલું કે સાત સૂરોની સરગમ વગાડવાની છે મારે તારા સંસારમાં.....
ને બધા સૂર, લય, તાલની વાજાપેટી બેસૂરી છે !
એને સૂરીલા સાજમાં તબદીલ કરવાની યાત્રાના મોહભંગમાં ?
જડશે કે મને પ્રેમનો અર્થ કે પરિભાષા ?