જુઓ સખી

જુઓ સખી આજ પેલો કેસૂડો મને કંઈ કે'ઈ !

વગડાની વાટે ઓલો ફોરમતો મને કંઈ કે'ઈ !

બોલાવે એ તો સરોવરની મહેંકાતી પાળીએ..

લલચાવે એની લાલચટ્ટક લહેરાતી ડાળીએ.

જાણે બાહો ફેલાવીને, મારગ રોકીને કંઈ કે'ઈ !

જુઓ સખી આજ પેલો કેસૂડો મને કંઈ કે'ઈ !

ધીરેથી ઢોળ્યા એણે વગડામાં અવનવા રંગ.

બદલાઈ રહ્યા છે સખી, મારાયે નીતનવા ઢંગ.

તું કાન દઈ સાંભળ સખી, ફાગણિયો તને કંઈ કે'ઈ !

જુઓ સખી આજ પેલો કેસૂડો મને કંઈ કે'ઈ !

હા, રે ! એના ઉન્માદમાં થનથન હું નાચું.

નશીલી એની ફોરમથી લથબથ હું લાજું.

પ્યારા રંગે ઝબોળીને, મદમાતો મને કંઈ કે'ઈ !

જુઓ સખી આજ પેલો કેસૂડો મને કંઈ કે'ઈ !