જેવાં-તેવાં

જેવાં છીએ તેવાં છીએ; જેવાં-તેવાં જેવાં છીએ;

તમને ક્યાં છે જાણ સજનવા; નિત ટપકતાં નેવાં છીએ.

ઝાંખાંપાંખાં અજવાળામાં કંડારી કંઈ કેડી નમણી;

પગલે પગલે છાપ પડે એ શિલ્પ ગણો તો તેવાં છીએ.

કલ્પી જોયું રૂપ અનોખું કાયમનાં આ રમણ-ભ્રમણમાં;

દાહ ન લાગે; વાહ ન માંગે ઝળહળ દીવા એવા છીએ.

અલખધણીની ઓળખ ક્યાં છે; અમે ફકત છે પગલાં જોયાં;

પગલાં ફરતે ફૂલ સજાવી; ખુદને પૂછ્યું : કેવા છીએ ?

પરમ પુનિતા આંસું સાથે વ્યક્ત છતાં પણ અશબ્દ રહેતી;

પ્રેમ પ્રભાવક પાવક પળની નિશુલ્ક શાશ્વતસેવા છીએ !