હા, હું એક સ્ત્રી છું..

હા, હું એક સ્ત્રી છું..

ક્યારેક ખામોશ છું તો કયારેક કલશોર છું,

લોખંડના ત્રાજવે તોલાતી, સોનાની મહોર છું.

જીંદગીના ચાકડે ને સમયના ટપલે ઘડાઉ છું,

હું જ માટી ને હું જ પકવેલી માટલી નક્કોર છું.

રોજ બરોજ કેટ-કેટલા કિરદાર નીભાવું છું,

હું જ રાતની શીતલતા, હું જ ધખતી બપોર છું.

પવનની સાથે ઉડું તો કદીક સામે ઝઝુમું છું,

હું જ પતંગ, હું જ મારી માંજો પાયેલી દોર છું.

કુદરતની જેમ ઉગું છું, ખીલું છું ને ખરું છું,

ઉપવને હું જ ગુલાબ ને હું જ વાડનો થોર છું.

નાજુક વેલ છું, સંભાળ ને આધાર ઝંખુ છું,

બાકી હું જ જૂઈ છું ને હું જ મારો ગુલમહોર છું.

માળો બાંધુ ભલે, આભ આંબવાની હામ રાખું છું,

હું જ બુલબુલ છું, હું જ બાજ ને હું જ ચકોર છું.

મમતા અને ઋજુતાથી ભલે નબળી લાગુ છું,

જરુર પડે, સિંહની ડણક ને તીક્ષ્ણ નહોર છું.

Kuntal Shah