એક જોખમ ખેડી લેજે

મોજથી મહાલવા તું એકલો ચાલી શકે એવી કેડી લેજે,
ને હોય જો પ્રીતનો મારગ તો એક જોખમ ખેડી લેજે !

ને જ્યારે ખાતરી થાય કે દુન્યવી વસ્ત્રો ઉતરી ગયા છે,
એ શાશ્વત નગ્નતાને ઓળખી ને પછી આકાશ ઓઢી લેજે !

ને ગજા બહારનો વરો તો મારી નાખશે જીવતે જીવંત,
જ્યાં સુધી પગ પહોંચે, ત્યાં સુધીની એક પછેડી લેજે !

ને ટોળા વચ્ચે પગ તળેથી સરકવા માંડે જો આ ધરા,
સમયસૂચકતા વાપરી, જાતને ત્યાંથી ખસેડી લેજે !

સ્થૂળ તો થશે સઘળું સાબિત આખરે માયા આ સંસારે,
બારીકથી પણ બારીક જો પરખાય,એ દૌલત ભેગી લેજે !

ને ઓળખ ભીતરના શત્રુઓની થઈ જાય જ્યારે સહજ,
ત્યારે અહમના અભેદ કિલ્લાને જાગરણથી ઘેરી લેજે !

પછી સ્વના "પરમ" સામ્રાજ્યનો કરીને તું રાજ્યાભિષેક,
કાયમ માટે એક અલગારી "પાગલ" પનને પહેરી લેજે !