એક ' હા ' માટે

એમને ત્યાંથી એક 'હા' માટે

હાથ ઊઠે છે, પ્રાર્થના માટે,

કોણ વલખાં ભરે સુરા માટે

છે અમારી તલપ તો ચા માટે,

કૈંક તો ખાસ છે જ મારામાં

દ્વાર ખોલે છે તું બધા માટે,

કોને તારો વિશેષ પ્રેમ હશે

કોણ છે જે રહે સદા માટે,

મન મનાવી લઈશ એ રીતે

કોઈ આવ્યું હતું જવા માટે,

બે ઘડી બેસવા નથી મળતું

આટલી દોડધામ શા માટે,

આ નદીયો શું કામની મારે

આંખ કાફી છે ડૂબવા માટે,

એકનો એક હું સહારો છું

જીવવું છે હવે વ્યથા માટે,

પ્રાણ પંખેરું તો ઊડી જાશે

અક્ષ ઝઘડો છો કાં જગા માટે ?