એક આભાસી ગઝલ

અધૂરી જિંદગી તારા હિસાબે વાત કરવી છે,

ભલે, ના સાંભળે તો પણ પરાણે વાત કરવી છે.

સવાલોના જવાબો જોઈએ મારે પ્રણય કાજે,

જતાં, આ શ્વાસની સંગે કિનારે વાત કરવી છે.

બહુ હેરાન ગતિ છે જો ખુદાની વાત કરવામાં,

બધા, સૂઈ જાય ત્યારે આ મજારે વાત કરવી છે.

મને આ 'આઈ લવ યુ' ને કહેતા જો શરમ આવે,

તો, આંખો બંધ રાખીને નકાબે વાત કરવી છે.

અજાણી જિંદગીનાં રાઝને 'આભાસ' ખોલી દે,

અમારી, હોય એવી લ્યો જનાજે વાત કરવી છે.