દીકરી
દીકરી
કેવું મજાનું ઘર સજાવી દે અમારી દીકરી ,
શાળા બનાવે ઘર મહી એવી અમારી દીકરી.
એ પૂછતી ભગવાન કેવા હોય છે દેખ્યા તમે,
પાછી તરત ભગવાન પણ બનતી અમારી દીકરી.
આખો દિવસ ગીતો મજાના ગાયને નાચે રમે ,
સૌને નચાવે વ્હાલથી ગાતી અમારી દીકરી.
ઘરઘર રમે ભોજન કરે સાથે જમાડે સાચવી ,
વાસણ ઘસે ને ગોઠવે લૂછી અમારી દીકરી.
આળસ કરે ના થાક લાગે એમને આખો દિવસ,
આખો દિવસ એ સુખ બની હસતી અમારી દીકરી.
એ ઝાડ પંખી ચીજ સાથે વાત કરતી હેતથી ,
માટે બધી ચીજો મહી રમતી અમારી દીકરી.
પળપળ મહી જન્મો બધા સાથે બતાવે સામટા,
લક્ષ્મી ઉમા વરદાયિની શક્તિ અમારી દીકરી.