ધમાલ

એવી ઘણી હજારો લાખો હલાલ થઈ છે,

બે ચાર જિંદગીઓ તો પણ મિસાલ થઈ છે,

ઉતરી છે દાજ કોઈ નિર્દોષ માનવી પર,

કારણ વિનાની રસ્તા વચ્ચે બબાલ થઈ છે,

જ્યાં ભીડ થઈ હતી ત્યાં જતાં બધા ડરે છે,

માલુમ થયું કે મોટા પાયે ધમાલ થઈ છે,

સંઘર્ષની છે વેળા, દરકાર થઈ પડી છે, 

ખાખી ચડી છે ખંભે ને આંખ લાલ થઈ છે,

હુંકાર એક મારી ને ટોળકી ભગાડી,

ઊભા રહે હજી પણ, કોની મજાલ થઈ છે ?

બીજા દિવસના છાપામાં આવશે ખબર કે,

ગુમનામ શખ્સ વચ્ચે બસ બોલચાલ થઈ છે.