અરજ
અરજ
આ શબ્દો નથી આ તો ભાવભરી એક પ્રાર્થના છે, અરજ છે,
ચૂકવી રહ્યો આમજ કેટલાયે જન્મોથી, બસ એવું કરજ છે !
તમામ સમયના એકમોથી આમ અમથું પર થઈ જવાનું,
સીધું જ સરળ થવું એક જ અરજમાં કેટલું સહજ છે !
સાત સૂરોની પારનું માણવું છે હવે સન્નાટાનું સંગીત મારે,
બે શબ્દોની વચ્ચે તમેય સાંભળો, એ તો શૂન્યની તરજ છે !
અરજના હક અદા કરૂં બે હાથ જોડી પરવરદિગારને,
નથી માંગ કોઈ, તોયે આપીને કહે કે એ તો ફરજ છે !
દિપક સમ ઝળહળે વજૂદ મારૂં રોશની થઈ રાતની,
સમગ્ર સૃષ્ટિની અરજમાં જે સળગે નામ એનું સૂરજ છે !
જડીબુટ્ટી છે મનનાં તમામ રોગની કે કરી લે સમાધાન,
વિવાદોથી પર રહેવું વિવેક જાળવી,એ જ સાચી સમજ છે !
દર્દનું ઝેર પીને મળે "પરમ" જીવન પ્રેમમાં તો ભાગ્ય સમજ,
"પાગલ" મરજ થઈ જા દર્દમાં, બસ અંતે એટલી જ અરજ છે !