తన మౌనం

గుండెగొంతు లోని పాట..తన మౌనం ఒలికించును..

ప్రేమించే చెలిమనస్సు..మధురముగా పులకించును..! 

మాట కన్న విలువైనది..ఏమున్నది ఓ నేస్తం.. 

ఒక తియ్యని పలకరింపు..చాలుకదా మురిపించును.!

చెలి విరహమె కానుకగా..తలపోయగ కుదిరేనా.. 

కలలోనూ చిత్రముగా..అల్లుకొనుచు కవ్వించును..!

మట్టి పంచు మాతృత్వపు..అనుభూతికి మాటలేవి..

చినుకుతోటి అనుబంధమె..రాగాలను పండించును..!

గాలికన్న విలువైనది..లేదన్నది నిజము కదా.. 

నీ మనసుకు ఆ ఈశ్వర..సంధానము జరిపించును..!

కాంతిపూల వనమున్నది..అంతరంగ గగనంలో.. 

చెలి ప్రేమను చవిచూపే..దీపరాశి కరుణించును..!

అక్షరాల పూలవాగు..ప్రవాహమే మధువుకదా..

చెలి చూపే సోకిందా..ప్రతిభావం చిగురించును..!

నిత్యచెలిమి మంత్రముంది..తన అందెల సవ్వడిలో.. 

పరిమళించు మధుగీతం..పదేపదే వినిపించును..!

వ్రాసేందుకు ముషాయిరా..తోడున్నది వేదికగా.. 

నిదానమే ధనమైతే..పలుకుతీరు రాణించును..!