నీలోనే ఉన్నా

వెన్నెలలో వెలుగులన్ని నీలోనే ఉన్నవిలే

తారలలో తళుకులన్ని నీలోనే ఉన్నవిలే

కనులలోని చీకట్లకు చుక్కలు చూపిస్తావు

పున్నమిలో కాంతులన్ని నీలోనే ఉన్నవిలే

ప్రేమమబ్బుపైన చరిచి చినుకులు కురిపిస్తావు

తొలకరిలో మెరుపులన్ని నీలోనే ఉన్నవిలే

స్ఫటికమంటి తనువులోన ఏ కిరణం వంగినదో

ఇంద్రధనువు విరుపులన్ని నీలోనే ఉన్నవిలే

చూపులన్ని మధుపాలై ప్రదక్షిణలు చేస్తున్నవి 

మధువనాల సొబగులన్ని నీలోనే ఉన్నవిలే

ప్రాణాలను ఐదింటిని వేటలాడుతుంటావు

కందర్పుని శరములన్ని నీలోనే ఉన్నవిలే