నేటి జీవితం

పచ్చ నోట్ల కట్టలే నేడు ప్రామాణికం 
విలువలన్నీ వీధి సరుకులై కూర్చున్నాయి 
*అమ్మతనము* కాస్త రూపం మార్చుకునే 
సరోగసిగా రూపాంతరం చెందుతుంది..

పుడమి చమటల్లో పుట్టిన ధాన్యం 
అన్నమై అందరినీ బ్రతికిస్తుంటే 
దగాపడ్డ రైతన్న దళారుల మోసంతో 
*అమ్మకంతో* ఆకలి తీరని వేదనలో మిగిలింది..

పవిత్ర ప్రజాస్వామ్యంలో రాజకీయం 
గద్దె ఎక్కే పెద్దల మాయాజాలంలో 
ఓటుకు నోటు ఖరీదై కూర్చుంది 
చేతి సిరా చుక్క *అమ్మకం* పెరుగుతూ పోతుంది..

పవిత్రమైన దాంపత్యం ఆదర్శ జీవనంలో 
వరుడు రేటు కోట్లల్లో చేరుకొని 
వరకట్నమే ఒక పిశాచిలా మారుతూ 
వధువు *అమ్మకం* దిగులుగా తయారయ్యింది.

ఆన్లైన్ వ్యాపారం ప్రపంచమంత వ్యాపించి 
చిన్న వస్తువుకు పెద్ద రేటు కడుతూ 
చిరు వ్యాపారులను కష్టాల్లోకి నెట్టుతూ
*అమ్మకంలో* ఆదిపత్యం చెలాయిస్తుంది...

సాధారణ జీవితంలో సమాజ గౌరవం 
లేని పెద్దరికాన్ని ధనంతో కొంటూ 
ఖరీదైన వస్తువులతో ఇంటిని పెంచుతూ 
*అమ్మకంతో* ఖరీదైన జీవనం సాగుతుంది..

అమ్మకం అంతా వ్యాపించి తిరుగుతూ 
పేదోడికి కన్నీళ్లను మిగిలిస్తూ 
పెద్దోడికి అప్పులను బహుమానంగా ఇస్తూ 
*అమ్మకమే* నేడు ఒక నమ్మకంగా ఉంటుంది..