మనసే మారి

అలరించే సుగంధాల..పూలగంప మనసేమరి..! 

కాల్చదగిన జ్ఞాపకాల..చెత్తగంప మనసేమరి..! 

వేదనతో జన్మలుగా..ఎడబాయని చుట్టరికం.. 

అనుబంధపు మిఠాయీల..పాతగంప మనసేమరి..! 

బాధైనా సౌఖ్యమైన..నేస్తాలే ఎవరికైన.. 

ఈ సంగతి బోధపడని..ఇసకగంప మనసేమరి..! 

భర్త ఎవరొ భార్య ఎవరొ..ఎంత వింత నాటకమిది.. 

పాత్రమరచి కుళ్ళుతున్న..పండ్లగంప మనసేమరి..! 

పరుగుతీయు కోరికలకు..పగ్గాలతొ పనేంలేదు.. 

గమనించగ ఆగలేని..కలతగంప మనసేమరి..! 

భయంతోటి వణుకిపోవు..విషయాలకు సెలవెపుడో..

ప్రశ్నించే చీకటింటి..మూగగంప మనసేమరి..!