కొత్త జన్మ...

ప్రతి మరణం కొత్తజన్మ..ఇస్తూనే ఉంటుందోయ్..! 

ప్రతిక్షణం ఓ పాఠం..చెబుతూనే ఉంటుందోయ్..! 

నేను-నాది అన్నవారు..ఎవ్వరేమి పట్టుకెళిరి.. 

మూర్ఖత్వం పేట్రేగుతు..పోతూనే ఉంటుందోయ్..! 

ఇష్టాలకు శిరసొంచిన..కష్టాలకు తెఱలేచును.. 

జీవనసత్యం అద్దం..పడుతూనే ఉంటుందోయ్..! 

ఏది-కలిమి ఏది-లేమి..చెలిమిమించి ధనమేదట.. 

మదినిపట్టి బుద్ధి శిలువ..వేస్తూనే ఉంటుందోయ్..! 

తడిసిన ధాన్యం ప్రభుతకు..కొనగా భారం సరెలే.. 

అన్నదాత ప్రాణాలను..తీస్తూనే ఉంటుందోయ్..! 

ఎదురుచూపు కోవెలలో..మనసేగా ప్రేయసియై.. 

వాసంతం మరలమరల..వస్తూనే ఉంటుందోయ్..! 

మాధవుడెవరో ఎక్కడ..వెతుకులాట ఎందుకటా.. 

శుద్ధ చైతన్యం విందు..చేస్తూనే ఉంటుందోయ్..!