ବାପା-ମାଆ ମୋ ଜୀବନ ଦେବତା
ବାପା-ମାଆ ମୋ ଜୀବନ ଦେବତା
ଶ୍ରୀମତୀ ବାସନ୍ତୀ ଲତା ସ୍ଵାଇଁ
ମାଆର ସେନେହ ପବିତ୍ର ଶରୀରେ
ଏ ଦେହଟି ମୋର ଗଢା
ବାପା ମାଆଙ୍କର ଅସରନ୍ତି ତ୍ୟାଗ
ତାଙ୍କ ସ୍ନେହ ମୋତେ ଲୋଡା l
ସେ ଅଟନ୍ତି ମୋର ଜୀବନ ଦେବତା
ଗଢିଛନ୍ତି ସ୍ନେହେ ମୋତେ
ମୋ ବାଲ୍ୟ କିଶୋର ଅସୀମ ଜଞ୍ଜାଳ
ତୋଳି ନେଇଛନ୍ତି କେତେ l
ଡାକିଲେ ଦେବତା ପଛରେ ଶୁଣନ୍ତି
ବାପା, ମାଆ ପ୍ରାଣ କାନ୍ଦେ
ପିଠିକି ଆଉଁସି ପଚାରି ବୁଝନ୍ତି
ଠିଆ ହୋଇ ଭଲ ମନ୍ଦେ l
ତାଙ୍କ ଅଭିଯୋଗ ମୋ ପାଖେ ନ ଥାଏ
ଦୁଃଖ ଚାପି ମୁଖେ ହସ
ଦୁଇ ପଦ କଥା ସେ ମୁଖୁ ଶୁଣିଲେ
ଦୁଃଖ ମୋର ହୁଏ ହାସ l
ଖୋଜି ମୁଁ ବୁଲିବି ସେ ମୁଖରୁ ହସ
ନ ଦେବି ସେ ମାନେ କଷ୍ଟ
ତାଙ୍କରି ସେବାରେ ଜୀବନ ଢାଲିବି
ପୂର୍ଣ କରି ତାଙ୍କ ଇଷ୍ଟ l