ସ୍ୱପ୍ନମାନଙ୍କ ପଟୁଆର
ସ୍ୱପ୍ନମାନଙ୍କ ପଟୁଆର
ଆଖିରେ ନିଦ ନାହିଁ
ରାତି ହୋଇଛି ଜବରଦସ୍ତ ସାଥୀ
ତାର ଅଝଟପଣର ଜିଦ୍
ଅସ୍ତବ୍ୟସ୍ତ କରି ରଖେ ଉଜାଗର
ଆଶାର ଚକମକି ଝଲ୍ସା ଆଲୁଅରେ
ସ୍ୱପ୍ନମାନଙ୍କର ପଟୁଆର
ସଭିଏଁ ରଙ୍ଗାରଙ୍ଗ କାର୍ଯ୍ୟକ୍ରମରେ
ମଜଗୁଲ୍ ଏକଦମ୍ ବିଭୋର
ଛନ୍ଦରେ ଛନ୍ଦି ପକାନ୍ତି ଭାବନାକୁ
ମିଳେନା ଜମାରୁ ନିସ୍ତାର
ତାଳର ତାଳିରେ କରନ୍ତି ଉତ୍ଫୁଲ୍ଲିତ
ଲୟରେ ବିଲୟ ହୁଏ ଧ୍ୟାନ
ଯେ ଯାହାର କରନ୍ତି କାୟା ବିସ୍ତାର
ବୁଝିବା ଅବସ୍ଥାରେ ନାହାଁନ୍ତି କେହି
ସବୁ ଜରୁରୀ ବୋଲି କରନ୍ତି ଚିତ୍କାର
କାହା ଲକ୍ଷ୍ୟର ପକ୍ଷ ନେଲେ
ସମର୍ଥନକୁ କରନ୍ତି ସବୁ ଅସ୍ଵୀକାର
ନିସ୍ତବ୍ଧତାକୁ କରି ଅନିର୍ଦ୍ଦିଷ୍ଟ କାଳ ପାଇଁ
ନିଜ ମନଠାରୁ ନିରୁର୍ଦ୍ଦିଷ୍ଟ
କୋଳାହଳରେ ଫଟାଇ ପକାନ୍ତି
ଅନ୍ତରର ଭିତର ବାହାର
ଫଗୁଣ ସାଜସଜ୍ଜାରେ ମତୁଆଲା ମଳୟ
ଚହଳରେ ଚହଲି ଯାଏ ନଜର
ସମୟର ରଖୁନାହିଁ କେହି ଖବର
ଏ ନୃତ୍ୟରତ ପଟୁଆର
ଛକରେ ଛକି ଯାଉଛି ଥକି
ଦୋଛକିରୁ କରି ପାରୁନି ବାଟ ବାହାର
ଉତ୍ସୃଙ୍ଖଳ ବିଶୃଙ୍ଖଳ ହୁଅନ୍ତି ସବୁ
ବିପ୍ଳବର ଘୂର୍ଣ୍ଣିଝଡ଼ ବାନ୍ଧି ଦାନା
ଆସିଲେ ମାଡ଼ି କିଏ ବା କରୁଛି ମନା
ଏ ସ୍ୱପ୍ନମାନଙ୍କର ପଟୁଆର
ନେତୃତ୍ଵ ବିହୀନ ଏକ ଆବେଗର
ଲଗାଇ ଲଗାମ୍ ଦେଲେ ତାଙ୍କୁ ଆରାମ୍
ନିୟନ୍ତ୍ରିତ ହୋଇ କରିବେ ସଲାମ୍
ସଭିଙ୍କର ଇଚ୍ଛା ହେବ ସାକାର।