Library
ଚହଲା ପାଣି
ଚହଲା ପାଣି
ସକାଳ ହେଲେ
ଘାସ ଗାଲିଚାରେ
କାକର ଝରେ
ଗୋରା ମୁହଁ ଦିଶେ ତୋଫା ,
ସଜ ଗୋଲାପ
କଅଁଳ କଢ଼ିରେ
ଭଅଁର ତୃପ୍ତ
ମନ ଲାଗେ ଭାରି ସଫା | ୧|
ଅଳସ ଦେହେ
ବୟସ ଲାଗିଲେ
ସ୍ୱପନେ ଉଡେ
ସାଥି ଖୋଜେ ନିରୋଳାରେ ,
କନକ ଗୋରୀ
ପାନ ପତରି ଗୋ
ସୁନ୍ଦରୀ ଭାରି
ପ୍ରୀତି ଝୁରେ ଅନ୍ତରରେ |୨ |
ଝରା ଶେଫାଳି
ଦେହରେ ବୋଳି ଯେ
ମହକେ ତୋଳି
ଚିତ୍ତ ମତ୍ତ ଏକା କରି ,
ମନ ଭ୍ରମରା
ସୁଖ ପସରାରେ
ହୁଏ ଅଧିରା
ସାଥୀବିନା ମରେ ଝୁରି |୩|
ପୋଖରୀ ତୁଠ
ସଖି ଗହଳିରେ
ଦିଶେ ଚହଟ
ହଳଦୀ ଗିନାରେ ଲୋଭ ,
ଚନ୍ଦ୍ରମା ତୁଲ
ନଜର ଲାଗିଲେ
ଅମୁଲ ମୁଲ
ପରଦେଶୀ ମଣେ ଶୁଭ |୪|
ଚହଲା ପାଣି
ଛନକା ଟାଣି ଯେ
ବିରହ ଆଣି
ମନ ହୁଏ ଛନଛନ ,
ଆଲୋ ମାନିନୀ
ନିତି ସ୍ଵପନେଯେ
ରୂପ ଚାନ୍ଦିନୀ
ଦିନରେ ଦେଖୁଚି ଜହ୍ନ |୫|
ବହୁଛି ବାଆ
ପଣତ ଖସିଲେ
ସରମି ଯାଆ
ଲାଜରେ ଟାଣଇ ଗାର ,
ନହନହକା
କଅଁଳ ଅଣ୍ଟାରେ
ପଶିଚି ରକା
କିଏସେ ମାରିଛି ତୀର |୬|
ସୋରିଷ ଫୁଲ
କରୁଛି ଗେଲ ଯେ
ମାରିଛ ଖିଲ
ସୁରୁଜ ଦିଶିଲେ ଲାଲି ,
ଷୋଳ ବୟସୀ
କଖାରୁ କଷି ଯେ
ବସିଛି ରୁଷି
ଯିବ ଶାଶୂଘର ଚାଲି |୭|
ପ୍ରେମ ପତର
ମଲ୍ଲି ଅତରରେ
ମହକେ ଘର
ଦାଣ୍ଡରେ ଚଉରା ପିଣ୍ଡି ,
ବାଜିଲା ବାଜା
କନିଆଁ ସଜା ଯେ
ଆସିବେ ରାଜା
କିଏସେ ବସିଛି ଉଣ୍ଡି |୮|
ବଂଶୀ ସୁର
ଲାଗେ ମଧୁର ଯେ
ଲବଣି କ୍ଷୀର
ବସିଛି କହେଁଇ ଜଗି ,
ସଖା ସୁବଳ
କାଳିନ୍ଦୀ ଜଳସେ
ଦିଶେ ନିର୍ମଳ
ରାଧା ପାଇଁ ପ୍ରେମରୋଗୀ |୯|
ବାଲ୍ୟମ୍ବା , ଢେଙ୍କାନାଳ -୭୫୯୦୧୫
ଦୂରଭାଷ :୯୭୭୬୮୯୩୩୪୮
