ગામડું
ગામડું
ગામડું હૈયે ગુંજતુ મારા,
આ શહેર ક્યાંથી ફાવે?
સોહામણા એ સ્વર્ગને મારા
શહેર લૂંટી જાવે.
પાદર પીંપળે ઝૂમતા ભેરુ,
આંબલી પીંપળી રમતા,
પંખીઓ સાથે સૂર પુરાવી,
ગીત મજાના ગાતાં.
આ આનંદમેળા મ્હાલવા ભેરુ
અમને નહી ફાવે,
ગામડું હૈયે ગુંજતુ મારા,
આ શહેર ક્યાંથી ફાવે?
રમતા રહેતા ગિલ્લીદંડા,
લખોટી ને ભમેડા,
ઘુમતા દિ'ભર લઇને ભેરુ
સાઇકલ કેરા પૈડાં,
આ વીડિયો ગેમનાં ચેડા ભેરુ
અમને નહી ફાવે,
ગામડું હૈયે ગુંજતુ મારા,
આ શહેર ક્યાંથી ફાવે?
નદી-તળાવે ઢીમકા મારી
સંગમા કેવા નાહતા,
વડની વડવાઇએ કેવા
હીંચકા મજાના ખાતાં!
આ સ્વિમીંગપુલના સ્નાન ભેરુ;
અમને નહીં ફાવે,
ગામડું હૈયે ગુંજતુ મારા,
આ શહેર ક્યાંથી ફાવે?
સંગ ભેરુની સીમ-શેઢાએ,
બોરડી બોરા ખાતાં,
ભવાઈ, નાટક, નટ, મદારીનાં,
ખેલ જોવા જાતાં.
આ સિનેમાની સોબતે ભેરુ,
પોપકોર્ન ક્યાંથી ભાવે,
ગામડું હૈયે ગુંજતુ ''મનન",
આ શહેર ક્યાંથી ફાવે?