ମଣିଷ ପ୍ରକୃତି

ତା . 01/04/2020, ବୁଧବାର,

ଲକ୍ ଡାଉନ..ଅଷ୍ଟମ ଦିବସ

ଡିଅର ଡାଏରୀ ,

ଆଜି ବାଲକୋନି ରେ ବସି ସକାଳ ସୂର୍ଯ୍ୟ ର ଆଭା କୁ ଦେଖି ପ୍ରକୃତିର ଅନୁପମ ସୌନ୍ଦର୍ଯ୍ଯ କୁ ଉପଭୋଗ କରୁଥାଏ । ଲକ୍ ଡାଉନ ହେବା ପରଠୁ ଘରେ ରହି ଟିଭି ନିଉଜ ରୁ ବାହ୍ୟ ଜଗତ କଥା ଟିକିଏ ଜାଣି ହେଉଛି । କାଲି ମୋ ପୁତୁରା ଫୋନ କରିଥିଲା । ଆମ ସମସ୍ତଙ୍କ ଭଲ ମନ୍ଦ କଥା ପଚାରୁଥାଏ । ମୁଁ ବି ତା ସହ କିଛି ସମୟ କଥାବାର୍ତ୍ତା ହେଲି ।

ଏଇ ଗୃହ ବନ୍ଦୀ ସମୟ ରେ ଫୋନ ଟା ସତରେ ନିଜ ବନ୍ଧୁ ବାନ୍ଧବ ଙ୍କ ସହ ଯୋଗାଯୋଗ ରଖିବାରେ ଭଲ ସାହାଯ୍ଯ କରୁଛି । ପୁତୁରା ବହୁତ ସମୟ ଯାଏ କଥା ହେଉଥାଏ । ତା ଘର ପାଖରେ ଥିବା ଦୋକାନ ରେ ପୋଲିସ ର ଚଢାଉ ହୋଇଥିଲା । ଦୋକାନୀ ଘରେ ନ ଥିଲା । ତା ଭଉଣୀ ଘରକୁ ଯାଇ ଲକ୍ ଡାଉନ ପାଇଁ ଫେରି ପାରି ନ ଥିଲା ଘରକୁ । ଦୋକାନୀ ର ସ୍ତ୍ରୀ ଦୋକାନ ସମ୍ଭାଳିଥିଲା। ଦୋକାନ ତ ପୁରା ଖୋଲୁ ନ ଥାଏ, ଦୋକାନ ପାଖରେ ଅଳ୍ପ ଅଣ୍ଡା, ଓ କ୍ଷୀର ବିକ୍ରୀ କରୁଥାଏ କିନ୍ତୁ ପ୍ରକୃତରେ ସେ ଲୁଚାଇ ଲୁଚାଇ ମଦ ପାଉଚ ଓ ଗଞ୍ଜାଇ ବିକ୍ରୀ କରୁଥାଏ । ପୋଲିସ କୋଉଠୁ ଖବର ପାଇ ତା ଦୋକାନ ଚଢାଉ କରି ମଦ, ଗଂଜାଇ ଜବତ କଲା । ଦୋକାନୀ ସ୍ତ୍ରୀ ବହୁତ ନେହୁରା ହୋଇ , କାନ୍ଦି କାନ୍ଦି ଆଉ କେବେ କରିବନି କହିବାରୁ ପୋଲିସ ତାକୁ ପ୍ରଥମ ଥର ବୋଲି ଚେତାବନୀ ଦେଇ ଛାଡିଦେଲେ କିନ୍ତୁ ଜିନିଷ ଜବତ କରି ନେଇଗଲେ । ଦୁଇ ଦିନ ପରେ ପୁଣି ସେଇ କାମ। ଦୋକାନୀ ସ୍ତ୍ରୀ ଏଥରକ ଦୋକାନ କି ଘରେ ମଦ, ଗଂଜେଇ ନ ରଖି ସ୍କୁଟର ଡିକି ଭିତରେ ରଖି ବିକ୍ରୀ କରୁଥାଏ କିନ୍ତୁ ଅଳ୍ପ ସଂଖ୍ଯାରେ । ପୁତୁରା ପାଖରୁ ଏମିତି କଥା ଶୁଣି ମୁଁ ସତରେ ଆଶ୍ଚର୍ଯ୍ଯ ହେଲି । ଭାବୁଥାଏ ଦେଶର ଅବସ୍ଥା କୁଆଡୁ କୁଆଡ କୁ ଗଲାଣି, ସେ ଆଡକୁ ନିଘା ନାହିଁ । ବାଇମୁଣ୍ଡି ର କୁଆଡେ ଚିନ୍ତା ନାହିଁ , ତାର ଖାଲି କଟକ ଚିନ୍ତା । ଦୋକାନୀ ସ୍ତ୍ରୀ ର ସାହସ ଓ ନିର୍ଲଜ ଗୁଣ କଥା ଭାବି ଆଶ୍ଚର୍ଯ୍ଯ ଲାଗୁଥାଏ ।ପୋଲିସ କୁ ବି ଭୟ ନାହିଁ । କୁକୁର ଲାଙ୍ଗୁଳ ଯେତେ ଯାହା କଲେ ବି ସିଧା ହେବନି । ସୁଜାତା ମୋତେ ଜଳଖିଆ ଖାଇବା ପାଇଁ ଡାକିବାରୁ ମୁଁ ପ୍ରକୃତି ସୌନ୍ଦର୍ଯ୍ଯ ଅବଲୋକନ ରୁ ମଣିଷ ପ୍ରକୃତି ଚିନ୍ତାରୁ ଓହରି ବାସ୍ତବ ଜଗତ କୁ ଫେରି ଆସିଲି ।

....କଲ୍ଯାଣୀ ନନ୍ଦ, ସମ୍ବଲପୁର, ଓଡିଶା....