ମନମୋର

ତୋ ହସିବା ଦେଖିଛି

କାନ୍ଦିବା ଦେଖିଛି

ପାଇବାରେ ବିଭୋର

ହଜେଇବାରେ ଆତୁର

ତୋ ଅନୁଭବ ସବୁ ଭୋଗିଛି ।

ଦୁ଼ଃଖ ବି ପାଇଛି ଅନେକ

ସୁଖରେ ହଜିଛି ବିବାକ

କହି ନପାରି ବହୁତ ସହିଛି

ରହି ନପାରି ଆଗୁଆ ବଢିଛି

ତୋ ଭିତରର କଥା ସବୁ ବୁଝିଛି ।

ତୋ ମୁଣ୍ଡ କଟି ତଳେ ପଡିବା

ତଳୁ ଉଠି ପୁଣି ମୁଣ୍ଡ ଟେକିବା

ତୋ ମାଟି ଦେହରେ ତରଙ୍ଗର ଢେଉ

ଅଭୟ ହାତରେ ପ୍ରତିଶ୍ରୁତିର ଛବି

ଦେଖି ଦେଖି ମୁଁ ମୁଗ୍ଧ ହୋଇଛି ।

ମୁଁ କିନ୍ତୁ ମୁକ୍ତ ତୋଠାରୁ 

ତୋ ଭିତରେ ଥାଇ ବି ନଥିଲା ପରି

ଦୂର ରାଇଜର ଅତିଥିଟିଏ ଭଳି

ମୁଁ କେବଳ ତୋ ପାଖେପାଖେ ଅଛି ।

ମୋତେ ଖୋଜେ ଯେବେ କେବେ

ତୋ ହାତଧରି ପ୍ରବୋଧିଛି କେତେ

ନିରାଶାର ଅନ୍ଧାର ଭିତରେ

ଉଜ୍ଜଳ ତାରାଟିଏ ଭଳି

ତୋ ଭିତରେ ଆଶାର ଦୀପଟିଏ ଜାଳିଛି ।

ମୁଁ ଚିରକାଳ ତୋ ସାଥୀରେ ଅଛି

ଆଜି କିନ୍ତୁ ମୁଁ 

ମୁକ୍ତ ଆଉ ସ୍ଥିର ତୋର ଏକା ସହଯାତ୍ରୀ ।