ଯୁଗ ବଦଳିଲା

ଶବ୍ଦରୁ ସୃଜନ-23. ଅନ୍ ଲାଇନରେ ଶିକ୍ଷା :  

ଯୁଗ ବଦଳିଲା ଶିକ୍ଷା ବଦଳିଲା, ବଦଳିଲା ଦେଶଗତି,

ଆମେ ବଦଳିଲେ, ଆଗୁଆ ହୋଇବା ବଢିବ ଆମର ଶକ୍ତି ।

କମ୍ପୁଟର ଶିକ୍ଷା ମୋବାଇଲ ଫୋନ ବଦଳାଇ ଦିଏ ସବୁ,

ପୁରୁଣା ନିୟମ ପୁରୁଣା ବ୍ୟବାସ୍ଥା ଆଉ ଚଳିବନି ବାବୁ !

ଘରେ ବସି ପାଠ ପଢ଼ିହେବ ପୁଣି ପରୀକ୍ଷା ବି ଦେଇହେବ,

ସବୁଯାକ ଜ୍ଞାନ ମେସିନରେ ଅଛି-ପଚାରିଲେ କହିଦେବ ।

ଶିକ୍ଷକ ଥାଆନ୍ତୁ ଲଣ୍ଡନରେ କିବା ଆଉ କେଉଁ ଦୂରଦେଶେ,

ତାଙ୍କ ସହ ଆମେ କଥାହେଇପାରୁ ତାଙ୍କ ପାଠପଢ଼ା ଦିଶେ ।

ସାରା ଦୁନିଆଟା ଗୋଟିଏ କୋଠରୀ ସବୁ ଅଛୁ ପାଖାପାଖି,

ସହଜ ସୁବିଧା ସୁଯୋଗ ମିଳୁଛି ଖୋଲା ରଖିଥିବା ଆଖି ।

ଜ୍ଞାନର ଯୁଗ ଏ' ବିଜ୍ଞାନ ବଳରେ ନାହିଁ କିଛି ଅସମ୍ଭବ,

ଅନ ଲାଇନରେ ଶିକ୍ଷା ଦେବାପାଇଁ ତାଲିମ ନେବାକୁ ହେବ ।

ମନ ଧ୍ୟାନଦେଇ ନିଜର ପାଠକୁ ପଢୁଥିବ ଯେଉଁ ପିଲା,

ନୂଆ କୌଶଳରେ ଜଗତ ଜିଣିବ ତା'ପାଇଁ ଦୁଆର ଖୋଲା ।

ଠକିବା ସୁବିଧା ରହିଛି ଏଥିରେ ମନେ ଭାବୁଥିବ ଯିଏ,

ନିଜେ ଠକିଯିବ ଅନୁତାପ କରି ପଛରେ କାନ୍ଦିବ ସିଏ ।