ଯାତ୍ରା
ଯାତ୍ରା
କେବେ ଆରମ୍ଭ ହେଲା ଏ ଯାତ୍ରା?
ଜଣା ନାହିଁ
ହୋଇ ପାରେ, ସୃଷ୍ଟିର ପ୍ରଥମ ଦିନରୁ ।
ଜାଣିଛ କି ଗନ୍ତବ୍ୟ ଠିକଣା ?
ହାଃ, ଗନ୍ତବ୍ୟ ଠିକଣା?
ନା’ ବନ୍ଧୁ ଏ ଯାତ୍ରାର
ଗନ୍ତବ୍ୟ ଠିକଣା, ସର୍ବଦା ଅଜଣା !
ଏ ଯାତ୍ରା ଜାରି ରହିଛି, ରହିବ,
ଆରମ୍ଭରୁ ଅନନ୍ତ କାଳ ଯାଏ,
ଯେ ପର୍ଯ୍ୟନ୍ତ,
'ସ୍ରଷ୍ଟା' ଜାଗ୍ରତ ଅଛି,
'ସୃଷ୍ଟି'ର ବିଶ୍ରାମ କିପରି ?
ବୃତ୍ତର ପରିଧୀରେ ପରିକ୍ରମା
ଏଇମିତି ଜାରି ରହିଛି, ରହିଥିବ,
ଅନନ୍ତ କାଳରୁ, ଅନନ୍ତ କାଳ ପର୍ଯ୍ୟନ୍ତ,
ଅନବରତ, ଅବିଶ୍ରାନ୍ତ ।
ହୋଇ ପାରେ,
କିଛି ପଥ ଯାତ୍ରା ପରେ,
ଆଉ କିଛି ବର୍ଷର ରିଚାର୍ଯ,
ଦଶ ମାସର ବିଶ୍ରାମ, କିଛି ବର୍ଷର ଦୁଳାଳ,
ପୁଣି ଯାତ୍ରାର କଷଣ ।
ଦାସତ୍ୱ ନୁହେଁରେ ବନ୍ଧୁ, ମୁକ୍ତି ମିଳି ଯିବ,
'ପରମ'କୁ ପାରିଲେ ଜାଣି,
ଅବା 'ସ୍ରଷ୍ଟା' ମିଳି ଗଲେ,
ମୁକ୍ତି ନୁହେଁ,
ମିଳି ପାରେ କିଛି ଦିନ ଲମ୍ବା ଅବକାଶ,
ପଦୋନ୍ନତି ମିଳିବ ଅବଶ୍ୟ !
ପୁଣି ହେବାକୁ ହେବ ସାମିଲ୍ ଏ
'ଚୌଷଠି ଜୋନୀ'ର ଅନନ୍ତ ଯାତ୍ରାରେ ।
ପ୍ରକୃତି ନିୟମ, ସୃଷ୍ଟି ଏ ବଞ୍ଚିବ, ବଢିବ,
ଯାତ୍ରା ଏଇମିତି କାଏମ୍ ରହିବ,
ଅନନ୍ତ କାଳ ଯାଏ,
ଋତୁଚକ୍ର, ଜନ୍ମଚକ୍ର, ପିଢି ଦରପିଢୀ ।
ଅନ୍ତହୀନ ଏ ଯାତ୍ରା, ଅବିରତ ଅବିଶ୍ରାନ୍ତ
ଦିବା ରାତି ଅହର୍ନିଶି କାର୍ଯ୍ୟରତ ।