ତୁମପାଇଁ ସଖୀ

ତୁମରି ଆଖିର ଜ୍ୟୋତି ମୋ ଆକାଶୁ

ଝରିଯିବ ସଖୀ ଆଲୋକ ହୋଇ

ତୁମରି ଦେହର ଚାରୁ ଚିତ୍ରପଟେ

ଲେଖିବି କବିତା ପୀରତି ବହି I

ତୁମରି କଣ୍ଠରେ ସ୍ୱରଦେଇ ସଖୀ

ଜୀବନ ଗୀତିକା ଗାଇବି ନିତି

ତୁମରି ମଥାରେ ଢାଳିଦେବି ସଖୀ

ମୋ ହୃଦୟ ତଳ ଅସରା ପ୍ରୀତି I

ତୁମରି ଗହଳ କେଶ ତଳେ ସଖୀ

ସାଇତି ରଖିବି ଅନ୍ଧାର ରାତି

ତୁମରି ଆଖିରେ ଦେଖିବି ଦୁନିଆ

ତୁମ ଖୁସି ପାଇଁ ପାତିବି ଛାତି I

ତୁମରି ଓଠରେ ଓଠ ଥାପି ସଖୀ

ପିଇବି ମଦିରା ଘାରିବ ନିଶା

ଦିଗହରା ମୋର ଜୀବନ ସରଣୀ

ତୁମରି ପ୍ରେମରେ ପାଇବ ଦିଶା I