ତୁମପାଇଁ ମୁଁ ପରିପୂର୍ଣ୍ଣ
ତୁମପାଇଁ ମୁଁ ପରିପୂର୍ଣ୍ଣ
ସବୁ ସୌନ୍ଦର୍ଯ୍ୟର ଗନ୍ତାଘର ତୁମେ
ତୃପ୍ତ କରିଛ ଆଖି
ହୃଦୟର ସ୍ୱରେ ତୁମପାଇଁ କେତେ
କବିତା ଦେଇଛି ଲେଖି I
ତୁମପାଇଁ ସଖୀ ସରଗ ସୁଷମା
ଆଖିରେ କରିଛି ବସା
ମଳୟ ପ୍ଳାବିତ କଣ୍ଠୁ ମୋ ଶୁଭୁଛି
ନବ ପଲ୍ଲବର ଭାଷା I
ପରିପୂର୍ଣ୍ଣ ମୋର ଜୀବନ ପାତ୍ର
ନାହିଁ କିଛି ଶୁନ୍ୟସ୍ଥାନ
ତିଆରିଛ ମୋର ମନ ପ୍ରାଙ୍ଗଣେ
ମିଳନ କୁଞ୍ଜବନ I
ମନେପଡେ ଆଜି ବିଗତ ବର୍ଷାର
ଭିଜା ଭିଜା ପ୍ରୀତିଗାଥା
ଛମ ଛମ ସ୍ୱରେ ଗୀତ ଗାଇ ମୋର
ଭାଙ୍ଗିଥିଲ ନିରବତା I
କହିଥିଲ କାନେ ପ୍ରେମର କାହାଣୀ
ଝୁମିଥିଲା ମୋର ମନ
ଶୁଷ୍କ ତରୁର ଶାଖାରେ ଶାଖାରେ
ଖେଳୁଥିଲା ଯଉବନ I
ସେଇଦିନ ଠାରୁ ହୋଇଛି ମୁଁ ସଖୀ
ତୁମରି ମନର ଛାଇ
ପ୍ରତି ମୂହୂର୍ତ୍ତରେ ଦେଖୁଛି ସପନ
ତୁମପାଇଁ ତୁମପାଇଁ I