ତୁମେ ଆସ

ମୋ ଆକାଶ ଭସା ବାଦଲରେ

ମୋ ସ୍ମୃତିର ଖୋଲା ଅଗଣାରେ

ତୁମେ ଆସ ଚାନ୍ଦଟିଏ ହୋଇ

ଅଜଣା ଅନ୍ଧାର ରାତିରେ—୧

ମନେ ପଡେ ତୁମରି ଆସିବା

ଝୁମ ଝୁମ ପାଉଞ୍ଜିର ଶବଦ

ଗାଆଁ ବାଟ ଧାନ ବିଲ ଦେଇ

ଖରା ବେଳେ, ସକାଳ, ସଞ୍ଜରେ

କେବେ ଅବା, ନଈ ଗଲେ ଛାଇ—୨

କେବେ ଆସ ଭିଜି ଭିଜି ଶ୍ରାବଣରେ

ମେଘର ଓଢଣୀ ଟାଣି

ଭିଜା ଭିଜା ମଟିର ବାସ୍ନାରେ

ଭିଜା ଭିଜା ତନୁ ମନ ନେଇ—୩

ସବୁଜ ଘାସର ପରେ ଥିରି ଥିରି

ଅଳତାର ପାଦ ଚିପି ଚିପି

ଟୁକ ଟୁକ ନାଲି ଶାଢୀ ପିନ୍ଧି

ସୁନ୍ଦର ସାଧବ ବୋହୁଟେ ହୋଇ—୪

କୁଆଁର ପୁନେଇର ଛେନା ଚାନ୍ଦ ଧରି

ଅଧା ଅଧା ଆଲୁଅ ଅନ୍ଧାରେ

ଛପି ଛପି ତୁମେ ଆସ

ପୁନେଇଁ ରାତିରେ—୫

କେବେ ଅବା ପଖେ ବସି

ଚୁପିଚୁପି କଥା କହି

କଅଁଳ ପରଶ ଦେଇ

ଦୂରେ ଚାଲି ଯାଅ ହସି ଦେଇ--୬