ତୁମ ନଜର ରେ ମୁଁ
ତୁମ ନଜର ରେ ମୁଁ
ବାରମ୍ବାର ଆଖି ଫେରେ ତୁମ ଆଡେ,
ମନ ର ପ୍ରଶ୍ନ ଖାତା ଟି
କେଜାଣି କେତେ ଉତ୍ତର ଚାହେଁ ତୁମଠୁ...।
କିନ୍ତୁ ସେ ଜାଣିଛି
ନା ତାକୁ ମିଳିବ କିଛି ଉତ୍ତର ନା ଶାନ୍ତ୍ବନା ....,
ଯଦି ମିଳିବ ,ସେ ଖାଲି କିଛି ଧିକ୍କାର ....।
ବିବାହ ବେଦୀ ର ସାତ ଶପଥ ରେ
ଆଞ୍ଜୁଳାଏ ପ୍ରେମ ଛାଡ଼ି କିଛି ମାଗି ନଥିଲି ,
ସେତକ ବି କେବେ ପାଇଲିନି ....।
ବାରମ୍ବାର ହାତ ବଢେଇ ଖାଲି ହାତ ରେ ଫେରିଲି ...।
ଦଶ ବର୍ଷ ରେ ଏ ପୃଥିବୀ କେତେ ଥର ଆବର୍ତ୍ତନ କରି ସାରିଲାଣି ,
କିନ୍ତୁ ଆଜି ଯାଏ ମୁଁ କେବେ ବି ତୁମ ନଜର ରେ ଦୋଷ ମୁକ୍ତ ହୋଇ ପାରିନି ....,
କି ପୂର୍ବ ର ସେ ଭଲ ପାଇବା ପାଇନି...।
ମନ ର ସବୁ ଇଚ୍ଛା କୁ ମାରି ଦିଏ ,
ସ୍ବପ୍ନ କୁ ଦଳି ଚକଟି କେଉଁଠି କବର ଦେଇ ଦିଏ ,
ନା କେବେ କରିଛି ଅଳି,
ନା କେବେ ମାଗେ ଉପହାର ,
ତଥାପି ତୁମ ନଜର ରେ ମୁଁ ବେକାର .....।
କେବେ ବି ବୁଝିନ ତୁମେ ମନ କଥା ,
ଆଉ କେବେ ବି ସାହସ ହୋଇନି ମୋର
କିଛି କହିବାକୁ ତୁମକୁ ....,
ପ୍ରତି ଟି କଥା ତୁମକୁ ଲାଗେ ,
କେଉଁ ଏକ ଗାଉଁଲି ଖଳ ପ୍ରକୃତି ପରି ,
ପୁଣି କେବେ ଲାଗେ ବିରକ୍ତିକର ...,
ଆଉ ଉତ୍ତର ରେ ମିଳେ ଆଦେଶ ନୀରବତା ପାଇଁ ....।
ତଥାପି ଏତେ ପରେ ବି ମୁଁ
ତୁମ ପାଇଁ ଅଦରକାରୀ ,
ମୂଲ୍ୟହୀନ ...., ସବୁଠୁ ଖରାପ ଗୋଟିଏ ସ୍ତ୍ରୀ ....,
ଆହୁରି ଅନେକ .....।
ଭଲ ପାଇବାର ସବୁ ସ୍ବପ୍ନ ,
ସବୁ ଆଶା, ସବୁ ପ୍ରତିଶ୍ରୁତି ଯେମିତି ତୁମେ ସେ ଚତୁର୍ଥୀ ହୋମ ରେ ଜାଲିଦେଲ.....,
ମନେ ହୁଏ କେଉଁ ଏକ ପ୍ରତିଶୋଧ ପାଇଁ ,
ଧରି ନେଇନ ତ ମୋର ଏ ହାତ କୁ ....।
ନା ସତରେ ମୁଁ କଣ ଏତେ
କୁତ୍ସିତ, ଏତେ କଦାକର,
ଏତେ କଦର୍ଯ୍ୟ , ଏତେ ଖରାପ ....।
ଜାଣିଛି ସବୁ ପ୍ରଶ୍ନ ବଦଳରେ
ମୋତେ ମିଳିଯିବ ତୁମଠୁ ଆଉ କିଛି ପ୍ରଶ୍ନ .....।
ସେଇଥି ପାଇଁ ନିରବି ଯାଇଛି ଏ ଓଠ ,
ସ୍ଥାଣୁ ପାଲଟି ଯାଇଛି ଏ ମନ ....।
ସବୁ ପରେ ବି ଦେଇନି ତୁମକୁ ଖୁସି ....,
ବୋଧ ହୁଏ କେବେ ବି ଦେଇ ପାରିନି ...,
ନା ଆଜି , ନା ଦଶ ବର୍ଷ ଆଗରୁ ....।
ସେଇଥି ପାଇଁ ......,
ବୋଧ ହୁଏ ମୁଁ ତୁମ ପାଇଁ .....,
ଅଦରକାରୀ , ମୂଲ୍ୟହୀନ ,
ଏମିତି ଅନେକ କିଛି
ଯାହାର କିଛି ଶବ୍ଦ ନାହିଁ........।
ଖାଲି ଅଛି ନୀରବତା.........।