Library
ତୁମ ନୀରବତା
ତୁମ ନୀରବତା
॥୧॥
ଆଜି ମୁଁ ଆହତ ବେଦନା ପୀଡିତ
ଦେଖି ତୁମ ନୀରବତା ।
ତୁମରି ସ୍ଥାନରେ ପାଉ ଅଛି ଏବେ
ଦୁନିଆଁର ଚଞ୍ଚକତା ॥
॥ ୨॥
ଛଳନାର ମୁଖା ଢାଙ୍କି ହୋଇ କିଆଁ
ବିଶ୍ୱାସଘାତ କରିଲ ?
ଜୀବନ ପାତ୍ରରେ ପ୍ରେମ ବଦଳରେ
ହଳାହଳ ଭରିଦେଲ ॥
॥ ୩॥
ଜୀବନର କକ୍ଷପଥେ ଉଭା ହେଲ
ଧୂମକେତୁଟିଏ ହୋଇ ।
ବିବସନା କଲ କୌରବ ସଭାରେ
ଦ୍ରଉପଦୀ ହେଲି ମୁହିଁ ॥
॥ ୪॥
ଚିରଦିନ ମୋର ହୃଦ ସିଂହାସନେ
ଆସୀନ ହୋଇଛ ତୁମେ ।
ବିଚଳିତ ନୁହେଁ ମାନସହଂସ ମୋ
ପବିତ୍ର ପରମ ପ୍ରେମେ ॥
॥ ୫॥
ତୁମରି ପରଶ ଉଷୁମ ନିଃଶ୍ୱାସ
ଅନୁଭବେ ମରମରେ ॥
ଆଖିଟିକେ ବୁଜି ପାରୁନାହିଁ ଏକା
ଅଛି ତୁମ ପ୍ରତୀକ୍ଷାରେ ॥
॥୬॥
ପବନରେ କାଳେ ତୁମର ବାରତା
ଆସିଯିବ ଭାସିଭାସି ।
ମନର ଅନ୍ଧାରୀ ଇଲାକା ଉଜଳି
ଉଠିବ ପାଇବି ଖୁସି ॥
॥୭॥
ଏତେଦିନ ଯାଏଁ କଥା ହୋଇନାହିଁ
ବୋଲି ଆବୋରେ ଶୂନ୍ୟତା ।
ହତାଶ ପଣଟା ମାଡି ବସେ ମତେ
ମନେ ଘାରେ ବିବଶତା ॥
॥୮॥
ଅସହ୍ୟ ଯାତନା କରେ ଆନମନା
ମୋତେ ତୁମ ନୀରବତା ।
ସ୍ମୃତିର ବିଜନ ବେଳାରୁ ସାଉଁଟେ
ଅତୀତ ସୁଖ ମୁକୁତା ॥
॥୯॥
ତୁମକୁ ମୁଁ ଖୋଜେ ଚକ୍ଷୁ ନୀରେ ଭିଜେ
ସଞ୍ଜ ଆଉ ସକାଳରେ ।
ନିର୍ଜନ କୋଠରୀ ଭିତରେ ବିଳପି
ମନର ଚକୋରୀ ଝୁରେ ॥
॥୧୦॥
ତଥାପି ରଖିଛି ଆଶାକୁ ବଞ୍ଚାଇ
କାଳେ ତୁମେ ଯିବମିଳି ?
ତୁମବିନା ଆଉ ବଞ୍ଚି ହୁଏନାହିଁ
ମନ ଦେହ ଉଠେ ଜଳି ॥
॥୧୧॥
ବିରହ ନିଆଁର ଧୂଆଁରେ ବିକଳ
ହେଉଛି ହୃଦୟ ମୋର ।
ଆସ ପ୍ରିୟତମ ଅନ୍ତରେ ମମ
ପ୍ରାଣ ଶାନ୍ତ ଲଭୁ ମୋର ॥
॥୧୨॥
ମେଞ୍ଚା ମେଞ୍ଚା ଛଳନାର ଅମ୍ଲଢାଳି
ଦେଲ ମିଛ ପ୍ରତିଶ୍ରୁତି ।
ଭଲପାଇବାର ମିଠା ପ୍ରତାରଣା
ତୁମ ନୀରବତା ଇତି ॥
